IHQ NEWS
Russia rama Salvation Army kum 25-na champha lawmna leh Pathian hnena lawmthu sawina Inkhawmpui neih a ni
Russia rama Salvation Army rawngbawlna chhunzawm a nih leh hnuah kum 25 champha lawmna inkhawmpui chu General André Cox leh Commissioner Silvia Cox World President of Women's Ministries te’n an hmanpui a. Moscow chhim lampang, 1000 kilometres-a hla, Rostov-on-Don khuaah inkhawmpui hi neih a ni a, mi tam tak te chu he inkhawmpuia Pathian fak leh chawimawia A thute ngaihthla turin an kalkhawm a ni. Russia ramah hian Salvation Army te’n Isua Krista Chanchin Tha hrilin rawngbawlna kum 1910 khan an lo tan tawh a. Amaherawchu dodalna avangin kum 1923 ah tihtawp a ni a, Communist Sorkar alo thlakchhiat hnu khan July 1991-ah khan bul tan that a ni leh ta a ni.
Inkhawmpui thupui chu Josua 3:5-na “Intithianghlim rawh u: naktukah LALPAN in zingah thil mak takte a ti dawn e” tih a ni a. Inkhawmpui hawn naah chuan Russia rama hnam hrang hrang te’n an hnam ziarang kaltlangin inpumkhatna an lantir a. General kaltlangin Pathian Thuchah ropui tak ngaihthlak thin a ni.
General chuan a thusawi naah kum zabi 21-a mihring mamawh na hrang hrang tanpui thei tura kan inbuatsaih a mamawh thu a sawi a. Khawvel puma Salvation Army memberte chu kum 2017 atanga Whole World Mobilising Campaign rawngbawlnaa theihtawp chhuaha lo tel theuh turin a sawm a ni.
General André Cox leh Commissioner Silvia Cox te hian an cham chhung hian Russia rama Kohhran hrang hrang hruaitute nen inkawmna leh chawhlui kilhona an nei bawk. Mipa puala inkhawm buatsaih chu General André Cox-in a hova, hmeichhe puala inkhawm chu Commissioner Silvia Cox-in a ho thung. Naupangte leh thalaite nen hun hlimawm tak an hmang bawk.
Inkhawmpui chhung hian thalai pakhat, ke that loh avanga wheelchair hmang chuan a testimony ropui tak a sawi a, mipuite rilru a hneh hle a. Thalai mi 3 chuan Pathian kohna chhanga rawngbawltu atana an inpek thu an puang bawk a ni. Commissioner Silvia Cox-in thalai kalkhawmte zinga a testimony leh Pathian kohna a chhan dan a sawi chuan thalaite rilru a hneh hle a. Thalai tam takte chu Zahnghaihna Thutphah-ah lo kalin Pathian hnenah an nun an hlan a, an zinga thenkhatte chu an vawi khat inhlanna te a ni hlawm a. Heng thalaite hian General te nupa lu chungah kut nghatin malsawmna dilin an tawngtai sak bawk a ni.
Thianghlimna Inkhawmah chuan General kaltlangin hmuhtheih khawngaihna rawngbawl hna thawh chungchang leh Isua Krista nena inlaichinna nung reng kan neih a pawimawhna thu ngaihthlak a ni a. Thalai mi 15 in Pathian kohna chhangin hun puma rawngbawl turin an inhlan a ni.
IET NEWS
Sorkar thuchhuahin a tarlan danin Rs.1000 leh Rs.500 note tihthih a nih tak thu-ah Division/District leh Corps zawng zawngte chi ai mai lo turin Territorial Headquarters chuan min ngen a. Rs.1000 leh Rs.500 note te hi Corps-ah leh Division/District-ah dawn chhunzawm zel a pawi lova, amaherawhchu December 2016 ral hma ngei a Bank-ah deposit emaw thleng fel vek theih chuan a lawmawm hle ang. A lem dawn palh theih lakah erawh fimkhur turin mitinte min chah a ni.
Pre-Centennial Celebration: Pre-Centennial Celebration chu November ni 12 & 13, 2016 atang khan Aizawl Temple Corps-ah neih a ni a. Inkhawm hi Inrinni zan Tawngtai Inkhawm atanga tanin Pathianni nileng inkhawmna hun neih tur a ni a, Pathian fakna leh chawimawina items hrang hrangte, zaihona leh Pathian thuchah ngaihthlak hona neih a ni dawn a. He Pre-Centennial Inkhawmpuia tel tur hian Territorial Headquarters chuan mi zawng zawng min sawm a ni.
Biakin hawnna leh hlanna neih a ni: Tuidam Corps Prayer Hall sak thar chu Commissioner Lalngaihawmi Territorial Commander chuan November ni 11, 2016 (Zirtawpni) khan hawnna leh Pathian hnena hlanna a nei a. Territorial Commander hi Captain Lalchhanhimi Cashier in a tawiawm bawk. [Pic.-Tuidam Corps Prayer Hall thar]
Tin, Zohmun Corps Prayer Hall sak thar chu November ni 10, 2016 (Nilaithawhtan) khan Lieut-Colonel Lalhmingliana Secretary for Personnel Administration chuan hawnna leh Pathian hnena hlanna a nei bawk. Major R Lalbiakliana Editor in a tawiawm a ni.
Myanmar Region-a Officers 11 in India Eastern Territory rawn tlawh: Myanmar Region atangin Salvation Army Officer 11 te chuan November ni 6 – 13, 2016 chhung hian India Eastern Territory an rawn tlawh a, Major Bo Jeppssen Regional Officer hovin an lo kal a ni. Heng Officer te hi Corps, District leh Region level-a thawkte an ni a. An cham chhung hian IET rawngbawlna peng hrang hrangte zir chiangin hun an hmang a ni. November ni 14, 2016 hian an awmna hmun lam panin an kir leh ang.
India Eastern Territory Centenary puala Ni 100 Tawngtai Khaidiat kharna hun hman a ni: India Eastern Territory Centernary puala Ni 100 Tawngtai Khaidiat kharna inkhawm chu November ni 9, 2016 (Nilaini) khan Aizawl Temple Corps-ah Major Lalrinliana, Vice-Chairman Prayer & Counselling Sub-Committee in kharna hun a nei a, Lieut-Colonel Zothanmawia Secretary for Programme Administration in a hmanpui a ni. Ni 100 Tawngtai Khaidiat hi Corps leh Society tinah chhum lo chat lova kalpui niin, Territorial Headquarters kaltlanga kaihhruaina siam chu mahni hun theuhah tihhlawhtlin a ni.
Tin, Prayer & Counselling Sub-Committee te hmalakna hian Tawngtai Inkhawmpui leh Campaign hmun tam takah neih tawh niin, November ni 18 - 20, 2016 chhung hian Mamit Area-a Corps leh Society hrang hrangah Tawngtai Campaign neih a ni leh dawn a. Hemi chhung hian Mamit Corps-ah Tawngtai Inkhawmpui neih nghal a ni bawk ang.
Territorial Council Vawi 17-na neih a ni dawn: India Eastern Territory ‘Territorial Council vawi 17-na’ chu November ni 17 & 18, 2016 hian Booth Mansion Conference Hall, Territorial Headquarters-ah neih a ni dawn a. He Council-ah hian Budget Session (2017-2018) neih bakah Agenda 13 ngaihtuah a ni ang. Territorial Council member hi 125 an ni a, Division leh Institution te, Corps leh Society aiawh, Officer leh Local Officer te’n rorelna hun an nei dawn a ni.
Tailoring Centre Final Examination: India Eastern Territory hnuaia Tailoring Centre zawng zawngte tan Final Examination November ni 14 – 18, 2016 hian neih a ni dawn a. Theory Exam in November ni 14, 2016-ah an tan ang a, November ni 15 – 18, 2016 chhungin Practical Exam an neih dawn a ni. Tailoring Centre tin hian Common Question an chhang dawn a, Practical Exam-ah hian Salvation Army Uniform hrang hrang bakah Mipa Kamis, Smart Pants, Pawnfen leh Kawr design hrang hrangte, Kawrkilh kaw reh leh Paper Cutting te a tel bawk ang. Exam naa titha te result puanna leh Tailoring Session kharna chu December ni 5, 2016-ah Booth Mansion Conference Hall, Territorial Headquarters-ah neih a ni ang. He hunah hian Tailoring Centre atanga zirchhuakte bul tan sakna tur Puanthui Khawl pek theuh an ni ang.
Red Kettle Service leh Christmas Parade: Kan hma lawka Krismas lo thleng turah mi harsa leh chanhaite’n Krismas hlim taka an hman theih nan India Eastern Territory chuan kum tina kan lo kalpui thin Red Kettle Service chu kalpui leh turin ruahmanna a kalpui mek a. Aizawl khawpui chhungah chuan December 10 – 17, 2016 hian neih tum a ni a. Tin, Division dangah pawh neih tura hmalak a ni bawk.
Christmas Parade pawh Traffic leh mipui nunphung tibuai lo zawngin December ni 11, 2016 chawhnuah neih turin ruahmanna a kalpui mek bawk a. Hemi hlawhtlinna tur hian Aizawl City Area chhunga Corps hrang hrangte chu lo inbuatsain turin Territorial Headquarters chuan min ngen a ni.
Issued by Public Relation Department ® India Eastern Territory
IET SOCIAL MEDIA
Twitter
Facebook
YouTube
Flickr