IHQ NEWS
General André Cox and Commissioner Silvia Cox World President for Women’s Ministries te’n Japan Territory-ah Territorial Congress an hmanpui
General André Cox and Commissioner Silvia Cox World President for Women’s Ministries te chuan tun hnai khan Tokyo an tlawh a, Japan Territorial Congress an hmanpui a, Japan Territory te’n malsawmna tam tak an dawng a ni. Congress tan hma hian General te nupa hi Japan ram lal te nen an chenna lal inah inhmuhna hun tha tak an hmang bawk a ni.
He Territorial Congress-a thupui chu ‘Catch the vision’ tih a ni a, Salvation Army member bakah Salvation Army thian tha, Sorkar leh khawtlanga mi pawimawh tak tak te, kohhran dang hruaitu te’n an telpui a. Salvation Army rawngbawlna kawng tinrenga an tanpui thin avangin General hian lawmthu a hrilh a ni. Congress chhung hian kawng hrang hranga Pathian fakna leh chawimawina neih a ni a; testimony nung tak ngaihthlak a ni bawk. Commissioner Silvia Cox chuan inkhawmnaa naupang lokalte chu malsawma tawngtai sakna hun a nei a, General hian mi 70 Puitling Sipai-a lawmluhna leh Pathian hnena hlanna hun urhsun tak a buatsaih bawk. Lakluh thar mi 2 in testimony an sawi a, War Cry-a thuchhuah kaltlanga Isua ke bula hruai thlen an nih thu leh Salvation Army rawngbawlna in rinna kawnga Isua Krista hnen a hruai thlen thu an sawi chuan mipuite rilru a khawih hle a ni. General André Cox chuan inkhawmpuia kal mipuite chu Salvation Army bul tan lai hun ang takin inpekna thuk zawk nena rawngbawl turin a fuih a. Zahngaihna Thutphah-a lo inhlan te zinga mi 6 te chu Salvation Army Officer turin an inhlan a ni.
General André Cox and Commissioner Silvia Cox te hian kum 2011-a Tsunami leh lirnghing avanga chhiatna nasa tak a thlenna hmun Minami-Sanriku leh Onagawa khuate a hmunah an tlawh a. Heng khuah te hian Salvation Army te’n kum 2011 atang khan tanpuina kawng hrang hrangin a thawk a - mipui chenna tur khaw thar pahnih an dinthar sak a, mi harsa chhawmdawlin, eizawna mumal zawk a buatsaih sak bawk a ni. Heng bakah hian khawtlang thatna tur leh hmasawnna ngaihtuahin naupangte school bang lo awm lawkna turte leh kum upa zawkte inkawmna hmun turte a buatsaih bawk. General te nupa hian khawtlang hruaitute an kawmnaah mi tam tak te’n an rawngbawlna kaltlanga beiseina a pek thu leh nunphung pangngaiah an nun theih thu lawm takin an hrilh a ni.
Hemi bakah hian October ni 21, 2016-a Japan ram thlanglama lirnghing thleng avanga in leh lo bakah bungraw dang chante hnenah Salvation Army-in tanpuina an pe bawk dawn a, hemi chungchangah hian General chuan, ‘Salvation Army te chu tisa leh thlarau siamtha tura awm kan ni’ tiin a sawi.
IET NEWS
Conference of Indian Leaders (COIL): October ni 27 – 30, 2016 chhung hian India ram chhunga territory paruk hruaitute inhmuhkhawmna ‘Conference of Indian Leaders’ chu Chennai-ah neih a ni a. He Conference hi Commissioner Lalzamlova International Secretary for South Asia leh Commissioner Nu-i Zonal Secretary for Women’s Ministries te’n an ho a ni. Territory paruk a Territorial Commander, Territorial President of Women’s Ministries, Chief Secretary leh Territorial Secretary for Women’s Ministries te an tel a ni. India Eastern Territory a kan hotute – Commissioner Lalngaihawmi Territorial Commander, Lieut-Colonel Davidson Varghese Chief Secretary leh Lieut-Colonel Mariamma Varghese Territorial Secretary for Women’s Ministries te chu Conference ah hian an tel a. Commissioner Lalngaihawmi Territorial Commander chu Church Auxiliary for Social Action (CASA) meeting Guwahati-ah a rawn tel nghal ang.
Territorial Harhna Inkhawmpui Vawi 2-na: October ni 28 - 30, 2016 chhung hian Territorial Evangelical Ministry Board hmalaknain Territory pum huap Harhna Inkhawmpui chu ITI Corps, Central South Division-ah neih a ni ang. October ni 29, 2016 (Inrinni) ah Territorial Evangelical Ministry speaker te pualin Seminar buatsaih a ni. Inkhawmpui chhung hian kawng hrang hrangin Pathian fak leh chawimawina neih a ni ang a, TEM Speaker te atangin testimony leh Pathian thuchah ngaihthlak a ni dawn a, he inkhawma tel tur hian sawm vek kan ni e.
Eastern Division-ah Outreach Workers’ Seminar neih a ni dawn: Territorial Outreach Mission Board atangin Major C Dawngliana, Major H Manthangi, Pu Remlalnghaka CSM (R) leh Pu Vanlalnghaka CS te chu Eastern Division, Manipur-ah Outreach Workers’ Seminar buatsaih turin October ni 31, 2016 hian an kal dawn a. Seminar bakah hian Eastern Division chhunga outreach rawngbawlna hmun hrang hrangte tlawhin, an hmasawnna te an enpui nghal bawk ang.
Himalayan Division-ah Women’s Ministries pualin Skill Training & Seminar neihpui dawn: November ni 3 & 4, 2016 hian Himalayan Division-a Women’s Ministries te pualin Skill Training & Seminar buatsaih a ni dawn a. He hun hmanpui tur hian Lieut-Colonel Vanlalnungi Territorial Home League Secretary leh Major J Lalpianpuii Women Development Officer te an kal a. Himalayan Division chhunga Officer leh Local Officer hmeichhiate hnenah training leh seminar hi an kaihruai dawn a ni.
Tawngtai Inkhawmpui neih a ni dawn: India Eastern Territory Prayer & Counselling Sub-Committee buatsaihin October ni 21 – 23, 2016 khan Lamka Corps-ah Tawngtai Inkhawmpui neih a ni a. Hemi rual hian Saikawt leh Tuinu Corps-ah Prayer Campaign neih a ni bawk. Tin, IET Centenary puala ni 100 Tawngtai Khaidiat pawh hlawhtling taka kalpui zel a ni a, a kharna inkhawm hi November ni 9, 2016 chhun dar 12:00-ah Bethlehem Corps ah neih a ni ang. November ni 18 – 20, 2016 chhung hian Mamit Corps-ah Mamit Area tan Tawngtai Inkhawmpui leh Tawngtai Campaign neih tum a ni.
Western Division League of Mercy Rally hmanpui dawn: Major H Manthangi Territorial League of Mercy Secretary chuan October ni 30, 2016 (Pathianni) nilengin Kolasib Vengthar Corps-ah Western Division League of Mercy Rally-ah hun a hmanpui ang.
Saitual CO Bial Sipai Inkhawmpui hmanpui dawn: Lieut-Colonel Lalhmingliana Secretary for Personnel Administration leh Lieut-Colonel Lalhlimpuii Human Resource Development Secretary te chuan October ni 28 – 30, 2016 inkar hian Saitual CO Bial Sipai Inkhawmpui an hmanpui ang.
Territorial Staff Songsters te’n India South Western Territory tlawh dawn: Territorial Staff Songsters te chu India South Western Territory-ah rawngbawlna nei turin October ni 31, 2016 (Thawhtanni) hian an kal dawn a. An cham chhung hian Pathian Fakna hla sak bakah kawng hrang hrangin rawngbawlna an nei dawn a, corps leh division hrang hrangah te hun an hmang ang. Songsters mi 24 te chu Songster Leader hovin an kal dawn a, November ni 12, 2016 ah Aizawl an lo thleng leh ang.
Territorial Salvation Army Youth General Council: Territorial Salvation Army Youth General Council chu October ni 28 – 30, 2016 chhung hian Serchhip Corps-ah neih a ni dawn a, hetiang hian hun hman a ni ang:
October ni 28, 2016 Thlenkim ni
October ni 29, 2016
10:00am - 1:00pm Rorel inkhawm
Chairman Captain K Lalrinpuia TYS Leader
Devotion Vanlalpara Hrahsel Executive Council Member
1:30pm - 3:30pm Budget sawihona
Chairman Malsawmtluanga Ralte ACS, Assistant Leader
Devotion Michael Lalramliana ECM
Budget pharhna Treasurer & Financial Secretary
Inrinni zan atanga Pathianni zan thleng vantlang inkhawm neih a ni ang a, Lieut-Colonel Zothanmawia Secretary for Programme Adminsitration in a hmanpui ang. General Council chhung hian Territorial Staff Songsters, Territorial Staff Band, Central North leh South Division Songsters, Bial leh Corps aiawh te’n Pathian fak leh chawimawina kawng hrang hrangin an nei ang a, Lieut-Colonel Zothanmawia Secretary for Programme Administration, Captain K Lalrinpuia Territorial Youth Secretary leh Major Lalhmingthanga Divisional Youth Secretary te hne atangin Pathian thuchah ngaihthlak a ni ang.
Pre-Centenary Congress Celebration: Pre-Centenary Congress Celebration chu November ni 12 & 13, 2016 hian Aizawl Temple Corps-ah neih tur a ni. Inkhawm hi Inrinni zan Tawngtai Inkhawm atanga tan tur niin a tuk Pathianni nileng inkhawmna hun neih tur a ni a, Pathian fakna leh chawimawina items hrang hrangte, zaihona leh Pathian thuchah ngaihthlak hona neih a ni dawn a. Hemi hunah hian a tam thei ang ber tel tur leh hemi atana lo inbuatsaih turin Territorial Headquarters chuan min ngen a ni.
Issued by Public Relation Department ® India Eastern Territory
IET SOCIAL MEDIA
Twitter
Facebook
YouTube
Flickr